دید خبری آژانس: د امریکا د بهرنیو چارو وزارت د دغه هیواد کانګرس ته خبر ورکړی، چې له پاکستان سره په همکارۍ به د افغان کډوالو د اوسیدو او ستنولو ظرفیت پیاوړی کړی.
د امریکا د بهرنیو چارو وزارت کانګرس ته خبرداری ورکړی چې په پاکستان کې د بند پاتې افغان کډوالو د غوښتنو د پروسس کولو لپاره به د خپلو ظرفیتونو لوړولو ته دوام ورکړي.
دا نوښت، چې د ۲۰۲۳ کال په جولای کې په محدوده کچه پیل شوی، موخه یې په پاکستان کې د افغان کډوالو د ستونزو هوارول دي.
د دې اونۍ په پیل کې کانګرس ته په لیږل شوي بیان کې، د امریکا د بهرنیو چارو وزارت وویل: د بهرنیو چارو وزارت د پاکستان سره د قضیې پروسس کولو ظرفیت پراخولو لپاره کار ته دوام ورکوي.
دوه کاله وړاندې د طا-لبانو په لاس د کابل له نسکوریدو راهیسې په لسګونو زره افغانان پاکستان ته داخل شوي چې غواړي امریکا او د لویدیځ نورو هیوادونو ته ولاړ شي.
متحده ایالاتو تر اوسه ۲۵۳۵۱ افغانان د بیا میشتیدنې لپاره په پام کې نیولي چې له دې جملې څخه ۴۷۵۲ یې لا دمخه خپلو نویو کورونو ته تللي دي.
