امریکا ته د ایران خبرداری
تاند- د ایران انقلابي ځواک (سپاه پاسداران) امریکا ته د بندیزونو په وړاندې بې ساری خبرداری ورکړ، ویې ویل چې د بندیزونو په صورت کې د ایران د شاوخوا له زر کیلومترۍ څخه خپلې اډې ټولې کړي.
د سپاه عمومي قوماندان محمد علي جعفري دا خبرداری وروسته له دې ورکړ چې د امریکا حکومت د ایران د لرواټنه توغندیو د پروګرام او نورو پوځي فعالیتونو په خاطر پر یو شمېر افرادو او بنسټونو بندیزونه ولګول.
امریکا دا بندیزونه یوه ورځ وروسته له دې ولګول چې تائید یې کړه چې ایران د ۲۰۱۵ میلادي کال له اتومي موافقې سره سم عمل کړی دی.
د امریکا د دې اقدام په عکس العمل کې د ایران د بهرنیو چارو وزیر محمد جواد ظریف وویل چې د متحدو ایالتونو بندیزونه ناروا او د اتومي موافقې د روحیې خلاف دي.
خو د ایران د سپاه پاسداران عمومي قوماندان د امریکا د بندیزونو د غندنې له پولې واوښت، او امریکا یې جګړې ته راوبلله.
امریکا د افغانستان په شمول د ایران په اکثرو ګاونډیو هیوادونو؛ لکه ترکیه، قطر، اماراتو کویت، بحرین او سعودي عربستان کې اډې لري او ټول هیوادونه ایران ته تر زر کیلو متره ډېر نژدې دي.
