دید خبری آژانس: د امریکا د بهرنیو چارو وزارت د مدیریت او سرچینو مرستیال ریچارډ ورما پاکستان ته د سفر په ترڅ کې اعلان وکړ چې د افغان مهاجرینو د لیږد بهیر به ګړندی او اسانتیاوی برابروی.
ریچارډ ورما د یکشنبې په ورځ (جدي ۲۴) په خپله ایکس پاڼه کې لیکلي چې پاکستان ته د خپل سفر په ترڅ کې یې له نړیوالو سازمانونو او متحدینو او همداراز له پاکستاني چارواکو سره د دوه اړخیزو اړیکو او له دغه هېواد څخه د زیانمنو افغانانو د لېږد بهیر د ملاتړ او اسانتیا په اړه د نظر تبادله وکړه.
ورما لیکلي: ما له هغو افغان کډوالو سره ولیدل چې په متحده ایالاتو کې د بیا میشتیدنې لپاره منل شوي دي. د متحده ایالاتو د داخلیدو په پروسه کې د دوی د کیسې او تجربو اوریدلو ستاینه وشوه.
هغه د دې په بیانولو سره چې له نړیوالو موسسو سره یې د افغان کډوالو د ساتنې او ملاتړ په اړه خبرې کړې دي، زیاته کړه: ما له هغوی سره په پاکستان کې د افغان کډوالو د اړتیاوو د پوره کولو لپاره د هغوی د پلانونو په اړه په زړه پورې خبرې وکړې.
ریچارډ ورما د پاکستان د بهرنیو چارو له وزیر جلیل جیلاني سره د دوه اړخیزو اړیکو، په ځانګړې توګه د مخ پر ودې اقتصادي ملګرتیا او د اقلیم د بدلون د ګډ ګواښ سره د مبارزې لپاره د «شنه اتحاد» چوکاټ په اړه هم خبرې وکړې.
هغه دا هم وويل چې له ښاغلي جيلاني سره يې د زيانمنو افغانانو په اړه خبرې کړې دي. په تېره يوه مياشت کې دا دويم ځل دى چې يو امريکايي چارواکي د زيانمن شويو افغانانو د لېږد په اړه د خبرو لپاره پاکستان ته سفر کړى دى.
د يادونې وړ ده، چې له افغانستان څخه د امريکايانو له وتلو دوه کاله تېرېږي، خو لا هم سلګونه امريکايي پناه غوښتونکي په افغانستان او پاکستان کې بې برخليکه پراته دي.
