دید خبری آژانس: ملګري ملتونه وايي، چې په لرو پرتو سیمو کې زیاتره افغان میرمنې د روغتیا ساتنې د اسانتیاوو د نشتوالي له امله د زیږون پر مهال مري.
د ملګرو ملتونو د وګړو صندوق په اکس نن ورځ په خپل کاري حساب کې لیکلي، چې په لرو پرتو کلیو کې ډېرې ښځې روغتیايي خدمتونو ته لاسرسی نه لري.
په ورته وخت کې، د ملګرو ملتونو د نفوس صندوق اعلان وکړ چې په لیرې پرتو سیمو کې د امیندوارۍ او ماشوم زیږون د ډاډمن کولو په هدف د ښځو سره د مرستې لپاره روغتیایی کورونه جوړوي.
د روغتیا د نړیوال سازمان د تازه شمېرو له مخې، په افغانستان کې د هرو ۱۰۰ زرو زیږونونو له ډلې ۶۳۸ ښځې مري.
همدارنګه په افغانستان کې د زیږون د روغتیا په برخه کې د نادولتي موسسو له خوا د ورکړل شویو شمېرو له مخې شاوخوا ۴۰ سلنه افغان مېرمنې په کور کې زیږون کوي، خو په لرو پرتو سیمو کې دا شمېره ۸۰ سلنې ته رسېږي.
