افغانستان کې پر ټولګډوني حکومت باندې ټینګار شوې
دید خبرې آژانس: د اروپایي ټولنې او منځنۍ اسیا د هېوادونو مشرانو په خپله لومړۍ غونډه کې افغانستان کې پر بشري وضعیت اندېښنه څرګنده کړې او دغه برخه کې یې د افغانانو پر ملاتړ ټینګار کړی دی.
تر غونډې وروسته په ګډه اعلامیه کې دغه راز راغلي چې د اروپایي ټولنې او منځنۍ اسیا هېوادونه افغانستان کې د یوه داسې ټولګډوني حکومت رامنځته کېدو لپاره پر خپلو ژمنو ټینګار کړی چې د ښځو، نجونو او قومي او مذهبي لږکیو حقونو ته د درناوي ترڅنګ، له خپلو ګاونډیو هېوادونو سره په سوله ییزه فضا کې ژوند وکړي او خپلې نړۍوالې ژمني عملي کړي.
دغه غونډه کې د ازبیکستان ولسمشر هیله څرګنده کړې چې نړۍواله ټولنه دې د افغانستان له سرپرست حکومت سره د رغنده خبرو د اسانتیا او د نړۍوالو ژمنو د پلي کېدو په برخه کې ملاتړ څرګند کړي.
شوکت میرضیایف د سیمهییزو بدلونونو په برخه کې د افغانستان د مهم رول یادونه کړې او زیاته کړې یې ده، چې نړۍواله ټولنه هغو ګواښونو ته چې له افغانستانه سرچینه اخلي، په کمه سترګه ګوري.
خو د اروپایي شورا رییس انټونیو کوسټا بیا ویلي، منځنۍ اسیا له افغانستانه د پېښېدونکو ګواښونو د مخنیوي او له منځه وړلو په برخه کې پراخه تجربه لري او په خبره یې: « موږ په ګډ کار سره سیمه باثباته او هوسا ساتلی شو.»
دغه اعلامیه کې راغلي چې ګډونوال د نړۍوالو معیارونو سره سم، زده کړو ته د ښځو او نجونو د لاسرسي غوښتنه کوي او دغه برخه کې د منځنۍ اسیا او اروپایي ټولنې د ځانګړو استازو د خبرو د دوام ملاتړ کوي.
د غونډې ګډونوالو دغه راز افغانستان او نورو هېوادونو ته د بشري مرستو د رسولو په موخه د ملګرو ملتونو د کډوالو عالي کمېشنرۍ له نړۍوالې اکمالاتي شبکې سره د ترمز د ټرانسپورټي او لوجسټیکي مرکز د یوځای کېدو هرکلی کړی دی.
د اروپایي ټولنې او منځنۍ اسیا د هېوادونو لومړنۍ غونډه تېره ورځ (جمعه د وري ۱۵مه) د ازبیکستان د ولسمشر په کوربتوب د دغه هېواد په سمرقند ښار کې ترسره شوه.
