افغانستان او ډنمارک د کډوالۍ ټولنې ترمنځ هوکړه لیک لاسلیک شو

دید خبرې آژانس: د افغانستان د کډوالو او راستنېدونکو چارو وزارت د ډنمارک د کډوالۍ له ټولنې سره د یو میلیون ۱۵۶ زره ۴۴۶ امریکایي ډالرو په ارزښت د همکاریو هوکړه لیک د لاسليک کېدو خبر ورکړی دی.

یاد وزارت د یوې خبرپاڼې په خپرولو سره ویلي چې د دې هوکړه لیک له مخې به دغه بنسټ پورتنۍ پیسې د نغدي مرستو وېش او د اقتصادي خوندیتوب او ودې اړوند په کابل، کندهار، پروان، زابل، غزني، میدان وردګ، کاپیسا، هرات، بادغیس، فراه او کونړ ولایتونو کې ولګوي.

د سرچینې د مالوماتو له مخې له یادو پیسو څخه به ۲۹۸زره ۵۵۶ تنه راستانه شوي، بېځایه شوي او کوربه ټولنه برخه واخلي.

د یادونې وړ ده، چې دا هوکړه لیک د کډوالو او راستنېدونکو چارو وزارت د مسلکي مرستیال مولوي عبدالرحمن راشد او د یاد بنسټ د رئیسې له لوري لاسلیک شو.