دید خبرې آژانس: د اسلامی امارت د صنعت او سوداګرۍ وزارت ویلي، چې افغانستان او چین د خپلو سوداګریزو اړیکو د پراختیا لپاره د یوې ګډې کاري ډلې پر جوړېدو سلا کړې ده.
د صنعت او سوداګرۍ وزارت سرپرست نورالدین عزیزي په کابل کې د چین له سفیر ژاو شینګ سره په کتنه کې، چین ته د صادراتو د ډېرښت، د ټرانزیتي لګښتونو د راکمېدو او همداراز په مستقیم ډول چین ته د صادراتو په برخه کې د اسانتیاوو د رامنځته کېدو په تړاو خبرې کړې دي.
د صنعت او سوداګرۍ وزارت ویاند اخندزاده عبدالسلام جواد په دې هکله طلوعنیوز ته وویل:«د دې خبرو اترو په پایله کې، دواړو خواوو هوکړه وکړ، چې د لا زیاتې همغږۍ، د سوداګریزو اړیکو د پراخولو او د سوداګرۍ په برخه کې د لازمو تسهیلاتو د رامنځته کولو لپاره یوه ګډه کاري ډله جوړ کړي او منظمې ناستې ترسره کړي.»
ورته مهال د سوداګرۍ او پانګونې خونه له چین سره د اقتصادي او سوداګریزو اړیکو پراخول اړین ګڼي، څو چین او له دې لارې نورو هېوادونو ته د افغانستان صادرات زیات شي.
د سوداګرۍ او پانګونې خونې اداري او مالي سرپرست میر زمان پوپل په دې هکله طلوعنیوز ته وویل:«که له چین سره ځینې هوکړهلیکونه لاسلیک شي او د صادراتو زمینه برابره شي، په ځانګړې توګه د زراعتي محصولاتو په برخه کې، لکه جلغوزې، چې مخکې توافق پرې شوی، او همدارنګه د انارو، شکرپارې (یو ډول خربوزه) او وچه مېوه، نو ګټه به یې د نورو هېوادونو پرتله ډېره وي.»
په افغانستان کې د اسلامي امارت له بیا واکمنېدو وروسته چین د هغو هېوادونو په ډله کې دی، چې له افغانستان سره یې اقتصادي اړیکې زیاتې کړي او ځينو چینايي شرکتونو هم د مسو، سرو زرو او تېلو په ګډون د افغانستان په بېلابېلو کانونو کې پانګونې کړې دي.
