افغانستان او عمان پر يو لړ مهمو موضوعاتو خبرې وکړې
دید خبرې آژانس: د اسلامي امارت د بهرنیو چارو وزارت سرپرست مولوي امیر خان متقي، عمان ته د خپل سفر په بهير کې د ياد هېواد د سلطان د دفتر له وزیر، د سوداګرۍ او پانګونې خونې له مشرانو او د اوقافو او دیني چارو له وزیر سره جلا جلا لیدنې کړې دي.
د بهرنيو چارو وزارت د مطبوعاتي دفتر د معلوماتو له مخې؛ په دغو ليدنو کې د افغانستان او عمان ترمنځ د پانګونې پر فرصتونو، د سوداګرۍ د زیاتوالي پر لارو چارو، د دواړو هېوادونو ترمنځ د مستقیمو الوتنو پیل، په عمان کې د افغان اتباعو پر مسایلو او فرهنګي راکړو ورکړو خبرې شوې دي.
د هېواد د بهرنیو چارو وزارت سرپرست، د عمان د سلطان د دفتر له وزیر څخه غوښتي چې د عمان سلطنت په دغه هېواد کې بندي افغانانو ته د بند مودې په کمولو او خلاصون کې مرسته وکړي چې خپل هېواد ته ستانه شي.
همدا رنګه، د افغانستان له لوري په عمان کې د مېشتو افغانانو لپاره د کونسلي ستونزو په حل کې له افغان سفارت سره د ياد هېواد د همکارۍ غوښتنه شوې ده.
ورته مهال، د عمان سلطنت وزیر ژمنه کړې چې په نږدې راتلونکي کې به په ځانګړو مناسبتونو کې په ياد هېواد کې د افغان بندیانو د خلاصون لپاره د عفوې زمینه برابره کړي او همدا رنګه په عمان کې مېشتو افغانانو ته به د کونسلي خدماتو په رسونه کې له افغان سفارت سره لازمې همغږۍ وکړي.
دغه راز د عمان د سوداګرۍ او پانګونې خونې له مشرانو سره په ليدنه کې هوکړه شوې چې د دواړو هېوادونو د سوداګرۍ د وزارتونو او خصوصي سکټور ترمنځ منظمې اړیکې رامنځته شي، څو د دواړو هېوادونو ترمنځ د سوداګرۍ پر زیاتوالي، د مستقیمو الوتنو د پیل او د پانګونې پر فرصتونو خبرې وکړي.
مولوي امیر خان متقي، د عمان د اوقافو او دیني چارو وزیر ته ویلي چې د دواړو هېوادونو ترمنځ د مساجدو، حجاجو او اوقافو تجربې شریکې شي او همدارنګه یې د یاد هېواد د اوقافو او دیني چارو وزیر ته بلنه ورکړې چې په افغانستان کې د جوماتونو د رغونې په برخه کې مرسته وکړي.
د عمان د اوقافو او دیني چارو وزارت چارواکو، د افغانستان د ارشاد، حج او اوقافو له وزارت سره د تجربو شریکولو او همکارۍ په برخه کې چمتووالی ښودلی دی.
