اسلامي امارت په بهرنیو مرستو کې لاسوهنه رد کړه
دید خبرې آژانس: اسلامي امارت د افغانستان د بیارغونې لپاره د امریکا د پخواني ځانګړي څېړونکي وروستۍ څرګندونې رد کړې.
په داسې حال کې چې امریکا متحده ایالتونو له ۸۵ ورځو راهیسې له افغانستان سره خپلې بهرنۍ مرستې ځنډولي، د افغانستان د بیارغونې لپاره د امریکا ځانګړي پخواني څېړونکي جان ساپکو ادعا کړې چې د امریکا د مالیه ورکوونکو د مرستو د پام وړ برخه د طالبانو لاسته لوېدلې ده.
نوموړي له فاکس نیوز سره په مرکه کې ټینګار کړی چې امریکا پر خپلو مرستو دقیقه څارنه نه لري او دا بهیر به همداسې دوام ومومي.
د افغانستان د بیارغونې لپاره د امریکا ځانګړی مخکینی څېړونکي، جان سوپکو ویلي: «موږ پوهیږو چې ډېره زیاته مرسته د طالبانو لاس ته ورغلې ده او پوهېږو چې دا بهیر به دوام ومومي، ځکه له بده مرغه هېڅوک په میدان کې نشته. پیسې د ملګرو ملتونو د خوړو نړیوال سازمان او نورو نړیوالو بنسټونو له لارې تېرېږي او موږ واقعاً دقیقاً څارنه نه لرو.»
بلخوا، د افغانستان اقتصاد وزارت د دغو ادعاوو په ردولو سره وایي، چې اسلامي امارت په نړیوالو مرستو کې هېڅ ډول لاسوهنه نه لري، بلکې د نړیوالو بنسټونو لپاره یې لازمې اسانتیاوې برابرې کړي دي.
د اقتصاد وزارت مسلکي معین، عبداللطیف نظري وايي: د افغانستان اقتصاد وزارت د افغانستان د بیارغونې لپاره د امریکا د مخکیني پلټونکي، جان سوپکو څرګندونې ردوي. د اسلامي امارت په حکومت کې د ټولو بهرنیو مرستو وېش روڼ او تر څار لاندې و. د اقتصاد وزارت هڅه هم دا وه چې بهرنیو مرستو ته اسانتیاوې برابرې کړي او هیڅ ډول لاسوهنه یې پکې نه درلوده.
سوپکو دغه راز زیاته کړې چې د امریکا ټولو ادارو په تېرو شلو کلونو کې په افغانستان کې پیسې په سمه توګه نه دي لګولې.
دا په داسې حال کې ده چې سیګر په خپل وروستي د ۲۰۲۶ کال د جنورۍ میاشتې تر ۳۱ د دې ادارې د فعالیت د درېدو خبر ورکړی و.
