دید خبرې آژانس: د ازبیکستان د ډاکټرانو یوه ۲۴ کسیزه ډله د بشري مرستو له یوې جوپې سره بلخ ته را ورسېده.
د ازبیکستان د سرخان دریا والي چې، د دې مرستو د سپارلو په موخه حیرتان بندر ته راغلی و ویلي چې، دغه ډاکټران یې د بې وزله ناروغانو د درملنې په موخه را لېږلي دي.
د ازبیکستان دې مرستو کې درمل، اوړه، غوړي، غوښه او مکروني شامل دي.
د ازبیکستان د سرخان دریا والي، الوغ بیګ قاسم اوف و ویل: « له افغانستان سره د ازبیکستان نننۍ مرستې له نورو بشرپاله مرستو سره توپیر لري، ازبیکستان نن د بشرپاله مرستو ترڅنګ ډاکټران، متخصصین او طبي ماشینونه هم راوړي چې بلخ ولایت کې ناروغانو ته خدمتونه وړاندې کړي او دا د ازبیکستان د ولسمشر په امر شوي دي.»
ورته مهال د بلخ د والي مرستیال د ازبیکستان له لوري دا مرستې د دواړو هېوادونو ترمنځ د دوستۍ بېلګه بللې او د دواړو هېوادونو ترمنځ یې د اړیکو پر پراختیا ټینګار کړی دی.
د بلخ د والي مرستیال، نور الهادي ابو ادریس زیاته کړه: « الحمدالله دا ډله چې نن دلته راغلې، ریښتیا هم ډېره اړینه ده چې، بې د وزلو او اړمنو ناروغانو درملنه وکړي. او دا د دوو ولایتونو او دوو هېوادونو لپاره یوه لاسته راوړنه ده.»
د بلخ د عامې روغتیا ریاست مرستیال، سید احمد شاداب و ویل: « له ازبیکستاني همکارانو او حکومته مو هیله ده چې دغه مرستې بسنه نه کوي او باید دوام وکړي او نوره همکاري هم وکړي؛ ځکه موږ د روغتیا په برخه کې همکارۍ ته اړتیا لرو او غواړو چې د دواړو هېوادونو ډاکټران د یو بل له تجربو په ګټنې خلکو ته روغتیایي خدمتونه وړاندې کړي.»
ټاکل شوې چې، دغه ۲۴ تنه ډاکټران د پنځه ورځو لپاره د حیرتان په بندري ښارګوټي کې د عمومي داخلې، جراحۍ، اعصابو، ماشومانو، نسايي ولادي، سترګو او غاښونو په برخه کې روغتیايي خدمتونه وړاندې کړي.
