اروپايي ټولنې له افغانستان سره ۲۰ میلیونه یورو مرسته وکړه
دید خبری آژانس: اروپایی اتحادیې د افغانستان له خلکو سره د مرستې لپاره د خوړو له نړیوال سازمان سره شل میلیونه یورو مرسته وکړه.
نن دوشنبه (د کب ۱۴مه) د خوړو نړیوال پروګرام له افغانستان سره د اروپايي ټولنې د ۲۰ میلیونه یورو په ارزښت د بشري مرستو اعلان وکړ.
دغه سازمان زیاته کړه چې دغه پیسې به په ۲۶ ولایتونو کې د ۳۰۰ زره افغانانو د خوراکي توکو له خوندیتوب سره مرسته وکړي.
د خوړو نړيوال پروګرام د اروپايي ټولنې د دې مرستو د هرکلي په ترڅ کې يوه اعلاميه خپره کړې او ويلي يې دي: «په دې مرستو سره د خوړو نړيوال پروګرام کولى شي د هغو کورنيو او زيانمنو افغانانو چې په ځينو سيمو کې مېشت دي، د خوړو امنيت ښه کړي».
دغه بنسټ زیاته کړه چې دغه پیسې به په کوچنیو پرمختیايي پروژو لکه د سیلابونو د ساتنې دیوالونو او د اوبو لګولو د کانالونو په جوړولو ولګول شي څو د طبیعي پېښو په وړاندې د افغانانو ژوند خوندي شي.
د خوړو نړیوال پروګرام په خپله اعلامیه کې ویلي، چې له دې مرستې سره به اروپايي ټولنه له ۱۴۰۰۰ بزګرانو سره د کرنیزو وسایلو او وسایلو په پېرلو او هغوی ته د روزنې په برخه کې مرسته وکړي، څو زیانمنې شوې کورنۍ وکولای شي خپلې خوراکي اړتیاوې پوره کړي.
دغه سازمان ویلي چې د ساختماني پروژو کار به شپږ میاشتې دوام وکړي چې په ترڅ کې به یې ټول ګډونوال د خپلو کورنیو د میاشتني خوراکي اړتیاوو د پوره کولو لپاره خوراکي توکي یا نغدې پیسې ترلاسه کړي.
