آصف: طا-لبان د ترهګرۍ ضد د پاکستان د نويو عملیاتو ملاتړ نه کوي
دید خبرې آژانس: د پاکستان دفاع وزیر خواجه محمد اصف له پاکستاني وسله والو سره د طا-لبانو حکومت اړېکو ته په اشارې سره ویلي، چې طا-لبان د ترهګرۍ ضد د پاکستان د نويو عملیاتو ملاتړ نه کوي.
دی وايي، چې یو شمېر طا-لب چارواکي له پاکستاني طا-لبانو سره خواخوږي لري.
د پاکستان امنیتي ځواکونو په خیبرپښتونخوا او بلوچستان ایالتونو کې د ترهګریزو بریدونو له زیاتوالي وروسته د پاکستاني طا-لبانو د ځپلو لپاره د «عزم استحکام» په نوم نوي عملیات پیل کړي دي.
ښاغلي اصف د سې شنبې په ورځ د چنګاښ په پنځمه د پاکستان ډان نیوز ته وویل، چې ایران په بلوچستان ایالت کې د بلوڅ وسله والو د فعالیتونو سرچینه نه ده او تهران د وسله والو پر ضد د پاکستان د نویو عملیاتو ملاتړ کړی.
د پاکستان د دفاع وزیر وویل: «دا د افغانستان لپاره توپیر لري. ځکه چې په طا-لبانو کې داسې کسان شته چې له پاکستاني طا-لبانو سره خواخوږي لري، تر دې مخکې ټي ټي پي په افغانستان کې د طا-لبانو تر څنګ د تېر جمهوري حکومت په وړاندې جګړه کوله.»
پاکستان له څو میاشتو خونړیو بریدونو وروسته د پاکستاني وسله والو پر ضد نوي عملیات پیل کړي دي. په همدې حال کې اسلام اباد تور لګوي چې د طا-لبان حکومت ټي ټي پي ته پناه ورکړې او د هغوی د بریدونو مخه نه نیسي.
د طا-لبانو حکومت د پاکستاني وسله والو د ځپلو او شړلو لپاره د پاکستان غوښتنه رد کړې او له دغه هېواده یې غوښتي چې له ټي ټي پي سره خبرې اترې وکړي.
