ملګري ملتونه: په غزه کې له ۳۸۰۰۰ څخه زیاتې ښځې او نجونې وژل شوي دي

د دید خبري اژانس: د ملګرو ملتونو د ښځو څانګې په یوه نوي راپور کې اعلان کړی چې په غزه کې د وروستۍ شخړې له پیل راهیسې له ۳۸۰۰۰ څخه زیاتو ښځو او نجونو خپل ژوند له لاسه ورکړی دی.

د دې راپور پر بنسټ، صوفیا کالتورپ وویل چې پدې شمیره کې ۲۲۰۰۰ ښځې او ۱۶۰۰۰ نجونې شاملې دي. د هغې په وینا، په اوسط ډول، هره ورځ په دې بریدونو کې لږترلږه ۴۷ ښځې او نجونې وژل شوي دي.

همدارنګه، د ملګرو ملتونو لخوا چمتو شوي احصایو له مخې، نږدې ۱۱۰۰۰ نورې ښځې او نجونې ټپیانې شوې دي، چې ډیری یې دایمي معلولیت سره مخ شوي دي.

په غزه کې د بشري وضعیت په اړه د اندیښنې په څرګندولو سره، د ملګرو ملتونو د ښځو څانګې ټینګار کړی چې د دې رجحان دوام به جدي بشري پایلې ولري، په ځانګړې توګه د ښځو او ماشومانو لپاره، او د دې بحران ته یې د نړیوالې ټولنې د بیړنۍ پاملرنې غوښتنه کړې ده.