بریتانیا د لبنان په جنوب کې د اسراییلو د امنیتي زون پراخول وغندل
د دید خبري اژانس: د لبنان په جنوب کې د امنیتي زون پراخولو لپاره د اسراییلو د رژیم نوی پلان له اعلان وروسته، د بریتانیا حکومت په سیمه کې د تاوتریخوالي د زیاتوالي په اړه اندیښنه څرګنده کړه.
د بریتانیا د بهرنیو چارو وزارت د پارلمان مرستیال وزیر همیش فالکونر په ایکس ټولنیز شبکه کې په یوه پیغام کې اعلان وکړ چې لندن د اسراییلو د لبنان په ځمکنیو عملیاتو د پراخولو پریکړې څخه “ژوره اندیښنه” لري.
هغه ټینګار وکړ چې په هیواد کې له یو ملیون څخه ډیر خلک اوس مهال له خپلو کورونو څخه وتلو ته اړ شوي دي.
فالکونر دا هم خبرداری ورکړ چې اسراییل باید د هغو اقداماتو څخه ډډه وکړي چې کړکیچ لا پسې پراخ کړي او د لبنان د خاورې د نیولو له هر ډول هڅې څخه ډډه وکړي.
دا غبرګون وروسته له هغه راغی چې بنیامین نتانیاهو د یکشنبې په ورځ اعلان وکړ چې هغه د لبنان په جنوب کې د اسراییلو د پوځي کنټرول لاندې سیمې د پراخولو امر کړی دی.
وروستیو پرمختګونو د لبنان او اسراییلو په پوله کې د نښتو د زیاتوالي او د هغې د بشري پایلو په اړه اندیښنې زیاتې کړې دي.