هند په افغانستان باندې د پاکستان هوايي بریدونه د نړیوالو قوانینو ښکاره سرغړونه بولي
د دید خبري اژانس: هند د افغانستان په خاوره کې د پاکستان د پوځي رژیم له خوا هوايي بریدونه په کلکه غندي او هغه یې د نړیوالو قوانینو، د ملګرو ملتونو د منشور او د دولتونو د حاکمیت د اصل ښکاره سرغړونه بولي.
په ملګرو ملتونو کې د هند دایمي استازي، پروتانه ني هاریش، په یوه بیان کې وویل چې د پاکستان دا اقدام د “ښکاره منافقت” یوه بیلګه ده ځکه چې د هغه په وینا، اسلام آباد له یوې خوا د نړیوال قانون او اسلامي یووالي د اصولو خبره کوي، مګر له بلې خوا، د روژې په مبارکه میاشت کې د ملکي وګړو پر وړاندې ظالمانه هوایي بریدونه کوي.
هغه ټینګار وکړ چې دا ډول کړنې نه یوازې د بشري اصولو خلاف دي، بلکې کولی شي په سیمه کې بې ثباتي او تاوتریخوالی هم زیات کړي. هاریش زیاته کړه چې نوي ډیلي تل د هیوادونو د ملي حاکمیت درناوی او د ډیپلوماتیکو لارو چارو له لارې د شخړو حل کولو ټینګار کړی دی.
د هند استازي دا هم وویل چې د هغه هیواد د افغانستان د ځمکنۍ بشپړتیا، ملي حاکمیت او خپلواکۍ بشپړ ملاتړ کوي او له ټولو هیوادونو څخه غواړي چې د نړیوالو پولو او قوانینو درناوی وکړي.
دا څرګندونې په داسې وخت کې راځي چې د افغانستان او پاکستان ترمنځ په ځینو سرحدي سیمو کې د وروستیو بریدونو وروسته تاوتریخوالی زیات شوی، چې سیمه ییز او نړیوال غبرګونونه یې هم راپارولي دي.