پاکستان: په سرحدي پوستو د طالبانو بریدونه د نړیوالو مکلفیتونو سرغړونه ده
د دید خبري اژانس: د پاکستان د بهرنیو چارو وزارت یوه اعلامیه خپره کړې چې د پاکستاني ځواکونو په پوستو د طالبانو حکومت وروستي بریدونه غندي او هغه یې د طالبانو حکومت د نړیوالو مکلفیتونو سرغړونه بولي.
د پاکستان د دفاع وزیر خواجه محمد آصف د هیواد او افغانستان ترمنځ د تاوتریخوالي د زیاتیدو خبرداری ورکړ او اعلان یې وکړ چې د افغانستان له خاورې څخه دوامداره بریدونه به د پاکستان امنیت ته زیان ورسوي.
هغه یو ځل بیا طالبان په سرحدي سیمو کې د فعالو وسله والو ډلو په کنټرول کې پاتې راغلي تورن کړل.
خواجه آصف په یوه تلویزیوني مرکه کې وویل: “ترهګریز فعالیتونه د افغانستان له خاورې څخه پاکستان ته لیږدول کیږي، او دا مسله کولی شي د دواړو هیوادونو ترمنځ اړیکې نورې هم ترینګلې کړي؛ پداسې حال کې چې پاکستان د شخړو او کړکیچ سره علاقه نلري.”
د پاکستان د دفاع وزیر دا هم ادعا وکړه چې په سرحدي سیمو کې خلک معمولا د ترهګرو له شتون څخه خبر وي او د دې وضعیت د کنټرول لپاره یې د طالبانو له حکومت څخه د جدي همکارۍ غوښتنه وکړه.
دا سره له دې چې د طالبانو حکومتي چارواکو په مکرر ډول ټینګار کړی چې دوی به اجازه ورنکړي چې د افغانستان خاوره د ګاونډیو هیوادونو د ګواښلو لپاره وکارول شي.
خو اسلام آباد د “سرحدي بریدونو زیاتوالی” په اړه ژوره اندیښنه څرګنده کړې او د تحریک طالبان پاکستان (ټي ټي پي) ډله یې د دې بریدونو اصلي عامل په توګه پیژندلې ده.
په وروستیو میاشتو کې د خیبر پښتونخوا او بلوچستان په سیمو کې سرحدي تاوتریخوالی زیات شوی دی، او د پاکستان امنیتي چارواکو په دې سیمو کې د خپلو ځواکونو د تلفاتو د زیاتوالي راپور ورکړی دی.