سټارمر د جنسي تیري په تور د دوو افغان پناه غوښتونکو د قومیت په اړه د شفافیت غوښتنه کوي
د دید خبری اژانس: د برتانیا په نانیټن ښار کې د یوې ۱۲ کلنې نجلۍ د جنسي تیري په تور د دوو افغان پناه غوښتونکو د نیول کیدو وروسته د شکمنو کسانو د هویت او قومیت د څرګندولو لپاره سیاسي فشار زیات شوی دی.
د برتانیا د اصلاحاتو ګوند مشر نایجل فراج د دوشنبې په ورځ (د اسد په ١٣مه) په یوه مطبوعاتي کنفرانس کې پر پولیسو نیوکه وکړه او د شکمنو کسانو د هویت په راپور ورکولو کې یې د شفافیت غوښتنه وکړه. هغه خبرداری ورکړ چې په داسې قضیو کې محرمیت به د خلکو بې باوري، د سازش تیوریو خپریدو او حتی ښاري بلواوو لامل شي، لکه څنګه چې تیر کال په ساوت پورټ کې پیښې وشوې.
د دې فشارونو په ځواب کې، د برتانیا لومړي وزیر سر کایر سټارمر هم له پولیسو څخه غوښتنه کړې چې د قانون په چوکاټ کې “د امکان تر حده په شفاف ډول” عمل وکړي او په حساسو قضیو کې د شکمنو کسانو د قومیت پورې اړوند معلومات خپاره کړي، ترڅو د عامه اندیښنو ته ځواب ووایی.
په هرصورت، د بشري حقونو ډلو خبرداری ورکړی چې د محکمې د پریکړې دمخه د شکمنو کسانو د قومیت افشا کول کولی شي په ټولنه کې د کډوالۍ ضد، نژاد پرست احساساتو او احتمالي تاوتریخوالی ته وده ورکړي.
د دوو پناه غوښتونکو قضیه لا هم تر څېړنې لاندې ده، او برتانوي چارواکو لا تر اوسه نور جزئیات نه دي خپاره کړي.